Overblog
Suivre ce blog Administration + Créer mon blog

Paco Inter La Popoloj, Klasbatalo, Homaj Rajtoj, Kontraŭseksismo, Medidefendado En Esperanto...

Serĉilo

Saluton!

Ekde 03/01/2012

free counters
Free counters

Bonvenon

24 mai 2018 4 24 /05 /mai /2018 20:25
ARUN SANKAR / AFP / Getty Images

24/05/2018

Sude de Barato, manifestacioj kontraŭ plivastigo de kupro-fandejo estis perforte subpremita de la polico. Kolizioj inter policistoj kaj pluraj miloj da manifestaciantoj daŭris ĝis merkrede. De post mardo, ili okazigis pli ol dekon da mortintoj. La surloka loĝantaro denuncas de monatoj la poluadon de aero kaj akvoj estigitan de uzino, kiu apartenas al la brita multnacia firmao Vedanta. Tiu afero ripetiĝas en Barato, kie la mediaj normoj estas kutime malobservataj profite al la grandaj industriaj projektoj.

Tuticorin tumultiĝas de post mardo. La interrompo de la projekto pri plivastigo de la fandejo de la grupo Sterlite Industries, filio de Vedanta, ne trankviligis la etoson en tiu havena urbeto ekstremsude de Barato. La policistoj denove pafadis, okazigante plian mortinton, dum la manifestaciantoj denove incendiis plurajn veturilojn.   

Multaj barataj politikistoj denuncis en la amasinformiloj kaj la sociaj retoj la reagon de la polico, kiu pafis per veraj kugloj al la homamaso. Mardon, dekoj da miloj da manifestaciantoj surstratiĝis, atakis policajn veturilojn, plurajn registarajn konstruaĵojn kaj restadan kvartalon, kie loĝas la laboristoj de Vedanta. La uzino, unu el la plej gravaj en Barato, estas fermita de preskaŭ du monatoj kaj plu restos tia almenaŭ ĝis la 6a de junio. La surloka aŭtoritato pri kontrolo de la poluado asertas siaflanke, ke la uzino ne respektas la internaciajn normojn.  

En 2013, la registaro de Tamilnado ordonis la fermadon de tiu uzino post likado de toksa gaso. Vedanta sukcesis apelacii kontraŭ tiu justica decido, sed estis kondamnita pagi monpunon je 12,5 milionoj da eŭroj.

neniammilitointerni - dans Sandetruado
23 mai 2018 3 23 /05 /mai /2018 20:52

23/05/2018

Bildo: lernejaninoj kovras sian vizaĝon por protekti sin kontraŭ poluado en Nov-Delhio (Barato), la 8an de novembro 2017.

SAJJAD HUSSAIN / AFP 

Tio reprezentas pli altan nombron ol la nombro da viktimoj de vojakcidentoj, aidoso, tuberkulozo kaj diabeto sumigitaj.

Ni timas aerpoluadon, ĉar ĝi kontribuas al la klimata varmiĝo de la planedo. Sed ĝi ankaŭ devus timigi pro ties rektaj konsekvencoj, kelkfoje nekonataj: ĝi mortigas ĉiujare 7 milionojn da personoj en la mondo, mencias la Monda Organizaĵo pri Sano (MOS) en jara bilanco (en la angla), publikigita merkredon 2an de majo.

Tiu nombro kreskas: la lasta bilanco publikigita en 2016 menciis 6,5 milionojn da mortoj ĉiujare. La nombro da mortintoj ligitaj al la enhejma poluado – pro interalie fornoj kaj hejtiloj – malkreskis de 4,3 ĝis 3,8 milionoj, la mortintoj kaŭzitaj de la ekstera aero eksplodis, de 3 ĝis 4,2 milionoj. 

 

Naŭ homoj el dek spiras poluitan aeron.  

Tiuj mortoj ne tuŝas la tutan mondon egalmaniere: 90% inter ili okazas en landoj kun malaltaj aŭ mezaj mongajnoj, eksplikas la MOS, ĉefe en Azio kaj Afriko.

La organizaĵo ligita kun UN emfazas alian nombron: naŭ loĝantoj de la planedo el dek, spiras aeron «kiu enhavas altajn nivelojn da poluiloj». La aeroj plej poluitaj en la mondo troviĝas en Mez-Oriento kaj Sud-orienta Azio.   

Tiu poluado estas konsiderata de la MOS kiel grava faktoro de netransdoneblaj malsanoj. La raporto mencias, ke 24% el la mortoj estas ligitaj al kormalsanoj kaj 29% al pulmokancero.

neniammilitointerni - dans Sandetruado
12 avril 2018 4 12 /04 /avril /2018 19:43

12/04/2018

Bildo: La loĝantoj de Volokolamsk, apud Moskvo, manifestacias kontraŭ la poluadaj forĵetaĵoj, kiuj kaŭzis enhospitaligon de infanoj, la 21an de marto 2018. Maxime POPOV. AFP

La loĝantoj de Volokolamsk, okcidente de Moskvo, manifestaciis la 1an de aprilo, postulante fermadon de apuda rubejo, el kiu emanas toksaj gasoj, kiuj poluadas la aeron de la komunumo. La kontestado nun vastiĝas laŭ dekoj da urboj situantaj proksime de la rusia ĉefurbo.  

Preskaŭ 2 000 personoj kolektiĝis sur la placo de la urbodomo de Volokolamsk, 100 kilometrojn nord-okcidente de Moskvo. Ili postulas fermadon de la apuda rubejo. Dek personoj, inter kiuj la organizinto de tiu malpermesita kolektiĝo, estis arestitaj de la polico fine de la manifestacio.

De post meze de marto, la 20 000 loĝantoj de tiu urbo mobiliziĝas, plendas sin pro invado de toksaj gasoj. Apuda rubejo, en kio amasiĝas forĵetaĵoj devenantaj de la ĉefurbo estas celata. La aktiveco de tiu rubejo kreskadis en decembro post la fermado petata de Vladimir Putin de alia rubejo en la granda ĉirkaŭaĵo de Moskvo.

La 21an de marto, 41 infanoj estis enhospitaligitaj en Volokolamsk. La aŭtoritatoj deklaris la urbon en prigarda stato, kaj fermis plurajn lernejojn. Vizaĝoŝirmiloj estis disdonitaj al la loĝantoj.

La kontestado vastiĝas hodiaŭ en deko da aliaj urboj situantaj ĉirkaŭ la ĉefurbo. La loĝantoj, kiuj timas je sia sano, organiziĝas por bloki la vojojn kaj rubejojn, kaj tio, malgraŭ la avertoj lanĉitaj de la aŭtoritatoj. En Rusio, specigo de la forĵetaĵoj estas kvazaŭ neekzistanta. Ĉiuj rubujoj de la ĉefurbo estas amasigitaj liberaere, en la kamparo.

neniammilitointerni - dans Sandetruado
3 janvier 2018 3 03 /01 /janvier /2018 18:57

03/01/2018

Bildo: Sud-Afrikaninoj kolektas karbon, proksime de termoelektra centralo.© AFP/Marco Longari 

Ili estas duoble viktimoj de la mizero. La loĝantoj de la getourboj ne nur estas la plej malriĉaj de Sud-Afriko, ili ankaŭ vivas en areoj poluataj de dekoj da jaroj de minekspluatado. La plej videbla poluado estas tiu polvo ellasata de karbo-restaĵo. Sed oni trovas ankaŭ arsenikon, plumbon, uranion, kiuj mortigas iom post iom la loĝantojn.

200 minejaj teramasoj kaj preskaŭ 600 forlasitaj minoj ekzistas ĉirkaŭ Johanesburgo. Ili estas heredaĵoj de la orimpetego kaj de la karbo-ekspluatado. Soweto, la getourbo de Nelson Mandela kaj ties miliono kaj duono da loĝantoj, enkalkulas multegajn kazojn de spirmanko.       

La kazoj de tuberkulozo kaj astmo tuŝas ĉiuaĝajn personojn. Ankaŭ haŭtmalsanoj multnombras.

La kaŭzo estas jena: ekde kiam la vento blovas, ĝi deponas danĝeran nigran polvon en la hejmoj. Eĉ la nutraĵoj estas kovritaj, se ili ne estas tuj konsumitaj. Ĝi entenas restaĵojn de kupro aŭ plumbo, cianuro kaj arseniko. La plej insida estas la radioaktiva poluado. En la malnovaj mingalerioj, 6 000 tunoj da restaĵoj de uranio estis enfositaj, laŭ universitata studaĵo. Cele al evito de konsumado de akvo poluata per uranio, Johanesburgo importas sian trinkeblan akvon el Lesoto, 380 kilometrojn for de tie.

Kompreneble, pluvoj kaj inundoj transportas poluaĵojn ĉien. Kanaloj ja estis fositaj piede de la minejaj teramasoj por kolekti la defluadajn akvojn. Sed pro manko de aranĝo, ili ofte estas damaĝitaj, kaj ellasas la poluatajn akvojn tra kampoj kaj herbejoj. Ĝuste tie, kie la gregoj paŝtiĝas kaj la infanoj ludas. Laŭ la asocio de lukto kontraŭ kancero, la situacio estas tiel senesperiga, ke la sano de 400 000 personoj estas minacata.            

La kompleta purigado de la malnovaj minoj montriĝas neebla, pro ĝia kosto kaj ĉefe, ĉar la esk-proprietuloj estas nesolventaj aŭ nekonataj. Koncerne la konatajn proprietulojn, ili silentas kaj neas la rilatojn inter poluado kaj sano de la loĝantaro. Ĉiaokaze, neniu epidemiologia studaĵo ekzistas pri tiu temo.      

La sola solvo por la loĝantoj estus forlasi la lokojn. Sed ili estas tro malriĉaj por fari tion.

neniammilitointerni - dans Sandetruado
17 octobre 2017 2 17 /10 /octobre /2017 19:18
AP Photo/Alexander JOE

17/10/2017

En Madagaskaro, almenaŭ 74 personoj mortis pro pesto, kaj pli ol 800 aliaj kazoj estas menciataj. Nacia plano de lukto estis aranĝita, sed la obstakloj estas multnombraj.  

Estas la tempo de serioza purigado en Antananarivo, kaj ĉiuj partoprenas. De post la fino de aŭgusto, centre de Madagaskaro, la «pesto-sezono» komenciĝis. Sed ĉi-jare, la malsano rapide disvastiĝis ĝis la ĉefurbo. Laŭ lasta bilanco publikigita mardon 17an de aŭgusto, fare de la ministrejo pri Sano, 805 kazoj kaj 75 mortoj estis jam konstatitaj en la tuta Granda Insulo, el kiuj almenaŭ 276 kazoj kaj 25 mortoj en Antananarivo.   

En la urbo, la fajrobrigadistoj mobiliziĝis en la bazaroj, cele al eliminado de la ratoj, kies puloj vehiklas peston. Sed en unu el la plej malriĉaj ĉefurboj de la mondo, higieno kolizias kun malriĉeco. En la kvartalo Ampefiloha, la brokantistoj kaj aliaj feraĵistoj ŝajne ne konscias pri la ligilo ekzistanta inter pesto kaj nesalubreco. Meze de stokoj da forĵetaĵoj, ili plu komercas, ignorante la danĝeron. «Blokadoj ligitaj al malriĉeco ja ekzistas, konstatas Jacques Razafindraibe, delegito de la urbestro de Antananarivo. Kio ĉefe zorgigas la homojn, estas scii kion ili manĝos hodiaŭ kaj morgaŭ, prefere al penso pri purigado. Tio ĉi estas la problemo».

En uzino de la ĉefurbo, kvar personoj estis trafitaj de la pulmopesto, kiu estas la plej grava kaj kontaĝa formo de la malsano, ĉar ne kuracita, la homoj povas morti en daŭro de 24 horoj. Teamo de la ministrejo pri Sano malinfektadis 25 0000 m2 da surfaco, kaj kuracadis 1 600 dungitojn.  

 

«Ni kvazaŭ spertas militon » 

La ĉefa defio, kion alfrontas la registaro, estas je ĉia prezo, ĉesigi la disvastiĝon de la malsano. La 11an de oktobro, la prezidento Hery Rajaonarimampianina proklamis ĝeneralan mobilizadon kontraŭ la pesto. «Ni kvazaŭ spertas militon», li deklaris dum surloka vizito en Antananarivo.

En la ĉefurbo, la aŭtoritatoj multobligis la preventajn aranĝojn. Kadre la nacia plano de lukto, agentoj pord-al-porde vizitas la loĝantojn ĉiutage, por atentigi ilin pri la plago. La universitato kaj la lernejoj estis fermitaj pro malinfektado, la busstacidomoj estas kontrolataj kaj la publikaj kunvenoj suspenditaj…

Alvokita por helpo, la "Monda Organizaĵo pri Sano" liveris 1,2 milionon da tunoj da dozoj de antibiotikoj, kapablaj protekti ĝis 100 000 personoj kaj kontingentojn de buŝprotektiloj kaj aliaj varoj por malinfektado. Ankaŭ agentejo de UN kaj la Ruĝa-Kruco urĝe formis volontulojn, taskitajn pri informado kaj prevento en la loĝantaro.

Sed malgraŭ ĉiuj ĉi streboj, la pesto plu okazigas viktimojn. Dek tri tagoj pasis inter la unua morto kaj la alarmo de la ministrejo pri Sano. Tiu malfruo estigas embarasan situacion por la aŭtoritatoj, kiuj asertis tri semajnojn antaŭe, ke ili regas la epidemion.

neniammilitointerni - dans Sandetruado
23 juin 2017 5 23 /06 /juin /2017 10:27

23/06/2017

Bildo: la edzo de Augustina, patro de kvin gefiloj, estis mortigita la 29an de septembro 2015 dum manifestacioj en Las Bambas, kiuj okazigis kvar mortintojn.

De jaroj tio daŭras, kaj la perua registaro finfine deklaris sanitaran urĝan staton en du sektoroj de la provinco Pasko.

De semajno, gepatroj tendumas antaŭ la ministrejo pri Sano en Limo: helpalvoko por la estonteco de iliaj gefiloj, kiuj suferas pro poluado estigita de eks-minejoj. Ili postulis tiun urĝan staton, kaj petas konstruadon de malsanulejo specialigita pri submetiĝo al pezaj metaloj. 

«La infektado devenas de la montetoj de Pasko. La vundoj, kiuj komencas malfermiĝi, ekstariĝas, kiel bakterioj. La kuracistoj asertas, ke tion kaŭzas plumbo. Pro tio, mi ĉeestas, mi petas de la ministrejo, ke ĝi indiku al ni lokon por loĝi, ĉar la montetoj de Pasko, suferigas nin», eksplikas Sarita Custodio.   

Preskaŭ 5 500 personoj estas koncernataj de la proklamo de la urĝa stato. Pli ol mil infanoj suferas pro infektado al plumbo kaj hidrargo en la urbo Cerro de Pasco.

«Mia filo suferas pri grava nivelo da plumbo-infektado, li havas 66 mikrogramojn da plumbo en ĉiu decilitro da sango, la limo estas nur 10. Mia alia filo havis 96 mikrogramojn, li mortis je la aĝo de 12 jaroj, kun 100 mikrogramoj da plumbo en la sango, mia filino havas 120… tiu registaro ne agadas. Tiu poluado mortigas nin iom post iom...»    

neniammilitointerni - dans Sandetruado
16 mars 2017 4 16 /03 /mars /2017 20:46

16/03/2017

Ĉinio povus eviti 3 milionojn da fruaj mortoj ĉiujare, reduktante sian atmosferan poluadon je la nivelo rekomendita de la Monda Organizaĵo pri Sano (MOS), laŭ studaĵo publikigita merkredon 15an de marto en la revuo The British Medical Journal (BMJ).

Ĉinaj esploristoj en la centro de kontrolo de la malsanoj de Pekino studadis la efikojn de la atmosfera poluado en 38 grandaj ĉinaj urboj (200 milionoj da personoj) inter januaro 2010 kaj junio 2013. Dum tiu periodo, la ĉiutaga koncentriĝo da enspireblaj partikloj PM10 (Particulate Matter 10 mikrometron diametre, ĉefe emisiataj de la trafiko, hejtado kaj agrikulturo) atingis averaĝe po 92,9 mikrogramojn en kuba metro (µg/m3) da aero, dum MOS rekomendas malaltigi tiun averaĝan jaran procenton al 20µg/m3.

Post studado de la 350.000 mortoj, kiuj intervenis en tiuj 38 urboj, inter 2010 kaj 2013, la esploristoj malkovris, ke altigo de la koncentriĝo de PM10 je 10µg/m3 koincidas kun altigo de la ĉiutaga nombro de mortoj je ĉirkaŭ 0,44%. Submetiĝo al la PM10 montriĝis ĝenerale pli fatala por la virinoj, la plenkreskuloj pli ol 60-jaraj, kaj la personoj suferantaj pri kardiovaskulaj malsanoj.

La esploristoj atingis la nombron de tri milionoj da fruaj mortoj en Ĉinio per «maldetala kalkulo», sed mencias, ke tiu nombro estas verŝajne subtaksita.  

neniammilitointerni - dans Sandetruado
1 novembre 2016 2 01 /11 /novembre /2016 13:55

01/11/2016

Foto: Izolitaj Indianoj en Peruo: http://www.survival.es/

Lundon, la peruaj aŭtoritatoj dekretis urĝan staton en regiono de Amazonio, damaĝita de poluado per hidrargo. Kaŭzis ĝin la kontraŭleĝa ekspluatado de orminejoj.

La daŭro de la urĝa stato, dekretita de la prezidento Ollanta Humala, atingas 60 tagojn. Laŭ la perua ministro pri naturmedio, tiu decido celas redukti la damaĝojn kaŭzitajn de tiu katastrofo.

« La registaro publikigis la dekreton  034-2016-PCM, kiu deklaras urĝan staton en la 11 sektoroj de la provincoj Manu, Tahuamanu kaj Tambopata pro poluado per hidrargo, kaj tio, surbaze de la leĝo pri mastrumado de la riskoj de katastrofoj », asertis Manuel Pulgar.

Laŭ la ministrejo pri naturmedio, la ministoj elverŝas ĉirkaŭ 40 tunojn da hidrargo en la riverojn de Amazonio ĉiujare, kio havas kiel konsekvencon detruadon de pli ol 100 000 hektaroj da tropikaj arbaroj en la regiono Madre de Dios.

La indiĝenaj kaj kamparaj komunumoj estas aparte vundeblaj. Ili ege dependas de fiŝkaptado pro nutraĵaj tradicioj bazitaj sur proteinoj. La poluado ankaŭ tuŝas katfiŝon tre ŝatatan de la surlokaj populacioj, kio instigis la registaron malpermesi konsumadon de tiu specio.

Pluraj studaĵoj malkaŝis, ke la loĝantoj de la regiono de Madre de Dios, apud la landlimo kun Brazilo atingis nivelojn de hidrargo, danĝerajn por ilia organismo.

Por venki tiun krizon, la aŭtoritatoj anoncis starigon de moviĝaj malsanulejoj, kontrolejoj kaj efektivigo de edukaj kampanjoj.

neniammilitointerni - dans Medidetruado Sandetruado
17 septembre 2016 6 17 /09 /septembre /2016 13:27
En Abiĝano, la GRPIE denuncas la nenormalan procenton da sulfuro en la dizelaj aŭ benzinaj karburaĵoj© REUTERS/Luke MacGregor/Files
En Abiĝano, la GRPIE denuncas la nenormalan procenton da sulfuro en la dizelaj aŭ benzinaj karburaĵoj© REUTERS/Luke MacGregor/Files

17/09/2016

La raporto « Dirty Diesel » de la NRO "Public Eye" pri la karburaĵo je malsupera kvalito destinita al Afriko, ekbruas en EburBordo. En Abiĝano, kie la tri koncernataj svisaj societoj ĉeestas, surloka NRO plenumis gazetkunsidon por denunci tiun situacion. La "Grupo pri esploro kaj defendo de la ekstraktaj industrioj" (GRPIE) denuncas la nenormale altan procenton de sulfuro, ĉeestanta en la dizelaj aŭ benzinaj karburaĵoj, kaj petas de la naciaj aŭtoritatoj, ke ili reviziu leĝaron, kiun ĝi juĝas kiel malaktualan.

En EburBordo, la Cop21, tiu granda internacia konferenco por respekto al medio ne respektis siajn promesojn. Multege tro da sulfuro kaj fajnaj polveroj ĉeestas en la karburiloj de la lando, kiu estigas multajn spirajn malsanojn, astmon aŭ kancerojn.

Po 30 ĝis 35 PPM, mezuroj de sulfuraj partikloj en dizela litro estas observataj, kontraŭ nur 8 ĝis 10 PPM en Eŭropo. Alarmaj procentoj da poluado, laŭ la naciaj NROj, kiel la "GRPIE" kaj ties reprezentanto Patrice Guei. Li petas de la eburborda registaro, ke ĝi rapide agadu por apliki la naciajn normojn al la internaciaj standardoj.

« Ni postulas de la registaro, ke ĝi reviziu tuj sian politikon, en la celo ebligi, ke la sulfura procento metata en la karburaĵoj, estu konforma al la internaciaj normoj, la eŭropaj aŭ usonaj normoj, en respekto al la medio », insistas Patrice Guei.

La rekta efiko en la publika sano estas taksita al 31 000 mortintoj jare.

La streboj al modernigo de la veturilaro en EburBordo utilas al nenio, se la karburaĵoj verŝitaj en rezervujon estas plu poluaj kaj nocaj al la sano de la Eburbordanoj.

La ĉefaj societoj de svisa negoco akuzataj en EburBordo, ne reagis, aŭ resendis al la komunikad-servoj de sia sidejo en Svislando. La tri societoj koncernataj de tiu poluado de la Eburborda aero estas Oryx, Vitol/Vivo Energy kaj Puma/Trafigura.

Trafigura, kiu antaŭ dek jaroj, enverŝis tunojn da venenaj forĵetaĵoj en Abiĝano kun ties rubokargo la Probo Koala.

neniammilitointerni - dans Sandetruado
26 avril 2016 2 26 /04 /avril /2016 13:19

26/04/2016

Tiuj laboristoj, soldatoj, ministoj, estis deplojitaj en la centralo tuj post la akcidento de 26a de aprilo 1986 por lukti kontraŭ la incendio. Tio okazis antaŭ tridek jaroj. En 1986, dum la nokto de la 25a ĝis la 26a de aprilo, incendio komenciĝis en la centralo de Ĉernobilo, en Ukrainio, okazigante la plej gravan nuklean katastrofon en la Historio.

Tuj, dungitoj de la centralo, ministoj kaj soldatoj estis mobilizitaj por prove limigi la konsekvencojn de la katastrofo. Inter 500.000 kaj miliono da likvidantoj, viroj kaj virinoj, estis taskitaj sekurigi la centralon kaj detrui la infektitajn vilaĝojn, submetiĝintajn al esceptaj niveloj de radiadoj.

Gravaj korpaj sekvaĵoj

Malbone protektitaj kontraŭ la alte radioaktivaj emanaĵoj, nur 50.000, t.e 10% el ili, plu vivas hodiaŭ. Anatolij Koliadin, elektristo estis el la unuaj, kiuj alvenis surloken. Inter tiuj, kiuj laboris kun li, duono jam mortis. Li estas nun 67-jaraĝa, kaj laboris dum tri jaroj por sekurigo de Ĉernobilo, antaŭ ol kuniĝi kun sia familio, reloĝigita en Kievo. Tri detruaj jaroj por lia sano: la elektristo akumulis malsanojn: tiroido, arterioj kaj okuloj estis trafitaj, kaj tio malhelpis lin trovi novan laborpostenon.

Bagatela monkompenso

Kiel ĉiuj likvidantoj, Anatolij Koliadin ricevas pension. Sed tiuj financaj helpoj, kiuj atingas nur 2000 hrivnojn (70 eŭroj) por la plej malaltaj, ne altiĝas aŭ tre malmulte, dum la prezoj ege altiĝas. Kaj tiu monkompenso ne sufiĉas por sin kuraci. «Por kelkiuj, aĉeti medikamentojn, kostas duonon el ilia pensio», substrekas Anatolij Koliadin.

Por akiri respekton de siaj rajtoj, multaj likvidantoj fondis asociojn. Kaj kvankam ili partoprenos ceremoniojn en Kievo kaj en pluraj aliaj ukrainiaj urboj por omaĝi ilin, la plej grava afero restos troviĝi inter si poste. Por trinki, interbrakumi, kalkuli la pluvivantojn. Kaj antaŭ ĉio, pensi pri tiuj, kiuj ne plu estas tie.

neniammilitointerni - dans Sandetruado
Créer un blog gratuit sur overblog.com - Contact - CGU -
.date span.text {display:none ; }