17/09/2024

En Honduro, alia medidefendanto estis pafmurdita fare de nekonatoj sabaton 14an de septembro. La lando de Centra Ameriko estas unu el la plej danĝeraj en la mondo por la aktivuloj pri medio.

Juan Lopez, 46-jara, estis multtrafita per kugloj elirante de preĝejo en Tikoa, nord-oriente de la lando.  

Juan Lopez estis enterigita dimanĉon 15an de septembro en la municipo  Tokoa, urbo nord-oriente de Honduro, kie li loĝis kaj estis municipa konsilisto, laŭ la surloka gazetaro.       

La prokuroro de Honduro, Johel Zelaya salutis viron, kies « vivo estas ekzemplo de lukto » indikante, ke « specialigitaj skipoj jam enketas, por ke lia morto ne restu nepunita ». Dimanĉon matene, la polico petis « de la publiko, kiu havas taŭgajn informojn koncerne la kriman agon, ke ili komuniku ilin anonimece » pere de ĝia urĝa telefonlinio 911.     

La hondura prezidentino Xiomara Castro promesis, ke « justico » estos realigita. « Ni kondamnas la aĉan murdon de nia kamarado kaj ekologiista gvidanto Juan Lopez en Tokoa. Mi ordonis al ĉiuj policaj fakoj fari lumon pri tiu tragedio kaj identigi la kulpintojn », deklaris la maldekstra prezidentino en la socia reto X. Ŝi promesis « Justicon por Juan Lopez ». La ekologiisto estis membro de la reganta Libera Partio.     

Juan Lopez estis kunordiganto de la kolektivo de lukto, kiu akuzis la minentreprenon "Los Pinares" pro ĝia ekspluatado de subĉiela minejo en tielaj kondiĉoj, ke ĝi atencas al la arbara rezervejo de Botaderos, apud Tokoa, 220 kilometrojn nord-oriente de Tegucigalpo. Pasintan majon, li akiris finon de la minaj koncesioj en tiu parko.  

« Juan Lopez estis defendanto de la medio, de la homaj rajtoj kaj modesta homo. Lia lukto konsistis en savado de nacia parko, kie troviĝas la fontoj de pluraj riveregoj. Iam, la lokaj komunumoj ekkonciiĝis, ke unu el la riverego koloriĝis brune. La homoj ne plu povis bani sin, ĉar ĝi kaŭzis jukojn. Eĉ lavi la tolaĵojn per la akvo de tiu riverego ne eblis, pro la elĵetoj de du ferminejoj », eksplikas Rita Romero, la advokatino de kolektivo, al kiu apartenis la aktivulo.

« En oktobro 2023, Interamerika Komisiono de Homaj Rajtoj ordonis aranĝojn por protekti Juan Lopez kaj 36 aliajn aktivulojn minacitajn. Sed la Hondura Ŝtato nenion faris. Kaj jen la rezulto : Juan estis murdita », ŝi bedaŭras. 

Juan Lopez konfidis en novembro 2021, ke li timas por sia vivo pro tiu lukto : « Kiam oni komencas defendi la komunan havaĵon en tiu lando, oni frontas potencajn interesojn (...). Kiam oni elhejmeniĝas oni scias, ke io ajn povas okazi, ke eble oni ne povos reveni », eksplikis la aktivulo, tiam 42-jara, kaj patro de 5-jara knabino. Li rakontis, ke li neniam eliras nokte kaj ne iras sole al malproksima kvartalo.

Laŭ raporto de la NeRegistara Organizaĵo "Global Witness", Honduro estas unu el la plej danĝera lando por la medidefendantoj. En 2023, ĝi situis en la tria loko en la mondo pri la nombro de murdoj de ekologiistaj aktivuloj, samloke ol Meksiko (18), malantaŭ Kolombio kaj Brazilo. Inter 2012 kaj 2023, 148 ekologiistaj aktivuloj estis murditaj en Honduro.

https://www.rfi.fr/fr/am%C3%A9riques/20240917-l-%C3%A9tat-n-a-rien-fait-au-honduras-des-associations-r%C3%A9clament-justice-apr%C3%A8s-l-assassinat-d-un-d%C3%A9fenseur-de-l-environnement

https://www.youtube.com/watch?v=24CtWlfRMb0

12/09/2024

Preskaŭ 200 aktivuloj pri medio estis mortigitaj en 2023, laŭ NeRegistara Organizaĵo

http://neniammilitointerni.over-blog.com/2024/09/preskau-200-aktivuloj-pri-medio-estis-mortigitaj-en-2023-lau-neregistara-organizajo.html

05/12/2023

Honduro: nova suspektato estas identigita en la murdo de la ekologiista aktivulino Berta Caceres en 2016

http://neniammilitointerni.over-blog.com/2023/12/honduro-nova-suspektato-estas-identigita-en-la-murdo-de-la-ekologiista-aktivulino-berta-caceres-en-2016.html

06/05/2024

Trakti temojn pri medio estas pli kaj pli danĝera por la ĵurnalistoj, kiuj kelkfoje riskas sian vivon pro siaj enketoj: 70% inter ili estis celo de atakoj, minacoj aŭ premoj de antaŭ 2009.

Oni memoras, ke en 2022 la murdoj de la brita ĵurnalisto Dom Phillips, kaj de la fama eksperto pri la indiĝenaj popoloj Bruno Pereira, estigis indignan ondon en la tuta mondo. Ili preparis libron pri la krimoj kontraŭ la medio en Amazonio.

Laŭ raporto de Unesko publikigita okaze de la Internacia tago pri gazetlibereco ĉi 3-an de majo 2024, pli ol 70% inter ili estis celo de atakoj, minacoj aŭ premoj pro sia laboro de post 2009.

Por starigi tiun raporton, la Unesko, kunlabore kun la Internacia federacio de la ĵurnalistoj, pridemandis en marto 905 ĵurnalistojn pri la medio en 129 landoj. « Almenaŭ 749 inter ili spertis perforton kaj timigon dum la dek kvin lastaj jaroj », mencias The Guardian.

Ekaperas el tiu ĉi raporto, ke « ĵurnalismo pri la medio fariĝis fako pli kaj pli danĝera », daŭrigas la brita ĵurnalo, por kiu Dom Phillips regule laboris. Li eksplikas :

« La karaktero de la laboro en lokoj ofte foraj kaj izolitaj, sed ankaŭ la traktitaj temoj, kiel petrolaj kaj minaj kompanioj, alproprigo de teroj kaj senarbarigo, kontribuas al la danĝero. »

Pli detale, inter la 70% da ĵurnalistoj, kiuj atestis pri premoj kaj timigoj, du el kvin raportis pri fizikaj perfortoj – agresoj, arbitraj detenoj, provoj de murdo kaj forkaptoj.

Tiu fenomeno ja kreskis dum tiuj kvin lastaj jaroj, kun « 111 incidentoj, kontraŭ 61 inter 2014 kaj 2018 kaj 45 inter 2009 kaj 2013 », listigas The Guardian. Krome, la pli granda plimulto de la ĵurnalistoj raportas pri minacoj, psikologiaj premoj aŭ eĉ retaj turmentadoj.              

Konsekvence, « preskaŭ duono el ili deklaris, ke ili cenzuris sin mem pro timo de atakoj aŭ endanĝerigo de siaj informfontoj », raportas la londona ĵurnalo.

Azio-Pacifiko, Latinameriko kaj Karaiboj estas la plej mortigaj regionoj por la ĵurnalistoj pri la medio, kie respektive 30 kaj 11 el ili estis murditaj de post 2009.

https://www.courrierinternational.com/article/le-chiffre-du-jour-menaces-et-pressions-concernent-la-majorite-des-journalistes-environnementaux

https://www.youtube.com/watch?v=-1iCtqEQ3o0

24/02/2022

Brazilo : naŭ gigantaj minaj kompanioj celas la indiĝenajn terojn

http://neniammilitointerni.over-blog.com/2022/02/brazilo-nau-gigantaj-minaj-kompanioj-celas-la-indigenajn-terojn.html

05/12/2023

La prokuroraro de Honduro menciis vendredon, ke ĝi lanĉis arestmandaton kontraŭ nova suspektato en la murdo en 2016 de la indiĝena kaj medidefendantino Berta Caceres.

Kiel kunordigantino de la Civita konsilio de popolaj kaj indiĝenaj organizaĵoj, ŝi kontraŭis projekton de hidroelektra baraĵo sur la rivero  Gualcarque (okcidente de Honduro). La justico pruvis, ke S-ino Caceres estis murdita pro tiu kialo komence de marto 2015, en la vilaĝo La Esperanza (okcidente de Honduro) fare de murdistoj, kiuj pafmortigis ŝin en ŝia domo meznokte.

Vendredon en komunikaĵo, la prokuroraro deklaris, ne malkaŝante la nomon, ke ĝi « starigis peton de persekuto akompanata de arestmandato kontraŭ alia homo implikita en la murdo ».    

Ok personoj estis jam kulpigitaj koncerne la murdon, kiu laŭ la prokuroroj estis puno pro ŝia agado kontraŭ la projekto de hidroelektra baraĵo sur indiĝenaj teroj. El la ok homoj, sep estis kondamnitaj en 2018 al punoj de 30 ĝis 50 jaroj pro la murdo de Berta Caceres, kaj la provo de murdo kontraŭ meksika naciano, kiu tiam troviĝis kun ŝi.  

Poste en 2020, Roberto David Castillo, ekzekutiva prezidanto de la entrepreno Desarrollos Energéticos (DESA) taskita pri la konstruado de la baraĵo, estis kondamnita ĝis 22 jaroj kaj duono da malliberejo. La Ĉefkortumo pri Justico de Honduro kondamnis tiun oficiron formitan ĉe la usona milita akademio de West Point, « pro lia partopreno al la murdo de la medidefendantino Berta Isabel Caceres Flores ».    

Almenaŭ 177 medidefendantoj estis mortigitaj en la mondo en 2022, laŭ raporto de la NeRegistara Organizaĵo Global Witness publikigita en septembro 2023. Inter 2012 kaj 2022, tiu nombro superas 1900 murdojn. Latinameriko estas la plej tuŝita, kun preskaŭ naŭ mortintoj el dek.

https://www.rfi.fr/fr/am%C3%A9riques/20231202-honduras-un-nouveau-suspect-identifi%C3%A9-dans-l-assassinat-de-la-militante-%C3%A9cologiste-berta-caceres-en-2016

https://www.vozdeamerica.com/a/episode_nueva-condena-caso-berta-caceres-330391/6041044.html

05/12/2019

Honduro: de 30 ĝis 50 jaroj da malliberejo pro la murdo de la ekologiistino Berta Caceres

http://neniammilitointerni.over-blog.com/2019/12/honduro-de-30-gis-50-jaroj-da-malliberejo-pro-la-murdo-de-la-ekologiistino-berta-caceres.html

14/09/2021

En 2020, nova rekordo de murdoj kontraŭ medidefendantoj

http://neniammilitointerni.over-blog.com/2021/09/en-2020-nova-rekordo-de-murdoj-kontrau-medidefendantoj.html

27/11/2023

Pasintan dimanĉon en Aŭstralio finiĝis la plej vasta ekoogiista mobilizado en la historio de la lando. Dum tridek horoj, centoj da homoj, enŝipigitaj sur centoj da kajakoj, flosantaj pontonoj, eĉ simplaj surfotabuloj, blokis la rodon de la haveno de Novkastelo, la plej vasta karbohaveno en la mondo.  

La eksportoj de la haveno de Novkastelo produktas 1% el la tutmondaj emisoj de forcejefikaj gasoj. Per tiu agado, la partoprenantoj intencis atentigi la laboristan registaron, kiu malgraŭ siaj promesoj lukti aktive kontraŭ la klimata varmiĝo, plu permesas la malfermadon de novaj karbominoj kaj gasboraĵoj.

« Ni estas lanĉontaj nian ŝipareton… Surmetu savveŝton, kaj ne dronu ! », krias organizanto. Fanfaro venis kuraĝigi la milojn da Aŭstralianoj, kiuj respondis al tiu semajnfino alvoke de la kolektivo Rising Tide por bloki la havenon de Novkastelo.

Gemma, ŝia edzo kaj iliaj du infanoj tiel pretiĝas enkanuiĝi. « Ni padelos en la haveno, ĉi tie en Novkastelo, ni malhelpos kelkajn karboŝipojn eniri kaj eliri el la haveno, kaj tiel haltigos 1% el la tutmondaj emisioj, ni do estas tre fieraj estis ĉi tie. »      

Multaj el la partoprenantoj voĉdonis favore al la Laborista Partio en la lastaj balotoj esperante, ke la lukto kontraŭ la klimata varmiĝo estu finfine konsiderata kiel serioza afero.  

Sed laŭ Bob Brown, pioniro de la ekologiista movado en Aŭstralio, la nuna registaro daŭre pligravigas la situacion. « Ili jam permesis malfermadon de 4 novaj karbominejoj. Tiu Laborista registaro diras, ke ĝi agas, sed fakte faras nenion. »

Dum tiu blokado, kiu disvolviĝis sen incidento, ok ŝipoj ne sukcesis forlasi la havenon de Novkastelo, malhelpante tiel la liveradon de 500 000 tunoj da karbo.        

https://www.rfi.fr/fr/asie-pacifique/20231126-australie-newcastle-le-plus-grand-port-charbonnier-au-monde-bloqu%C3%A9-par-des-%C3%A9cologistes

https://www.youtube.com/watch?v=cy9Gjq-pqJQ

22/11/2023

Unuiĝinta Reĝlando : senprokrasta malliberejo kontraŭ ekologiistaj aktivuloj de la movado Just Stop Oil

http://neniammilitointerni.over-blog.com/2023/11/unuiginta-reglando-senprokrasta-malliberejo-kontrau-ekologiistaj-aktivuloj-de-la-movado-just-stop-oil.html

05/05/2023

Klimata varmiĝo: varmfrapo ĉe la supraĵo de la oceanoj estas « prokrasta bombo »

http://neniammilitointerni.over-blog.com/2023/05/klimata-varmigo-varmfrapo-ce-la-suprajo-de-la-oceanoj-estas-prokrasta-bombo.html

25/12/2019

Madagaskaro: La lemuroj estas minacitaj de la klimata varmiĝo

http://neniammilitointerni.over-blog.com/2019/12/madagaskaro-la-lemuroj-estas-minacitaj-de-la-klimata-varmigo.html

14/03/2018

La klimata varmiĝo minacas duonon el la bestaj specioj

http://neniammilitointerni.over-blog.com/2018/03/la-klimata-varmigo-minacas-duonon-el-la-bestaj-specioj.html

26/10/2023

Pasintan lundon, la panama polico pafis larmigajn gasojn kontraŭ manifestaciantoj, kiuj bruligis pneŭojn, kaj blokis vojojn. Ili protestis kontraŭ kontrakto, kiu ebligas al kanada societo plu ekspluatadi la plej vastan kuprominon de Centr-Ameriko.

La manifestaciantoj maltrankviliĝas pro la potencialaj mediaj damaĝoj estigotaj de la mino, kiu apartenas al "First Quantum", unu el la plej gravaj ekstraktistoj de kupro en la mondo.

Post la protestoj, kiuj komenciĝis pasintan vendredon kaj daŭris dum la semajnfino, la manifestaciantoj denove surstratiĝis lundon en Panamurbo kaj aliaj provincoj, svingante afiŝtabulojn, sur kiuj estis legeble: « Protektu niajn naturajn resursojn », « Protektu la medion » kaj « Haltigu la detruadon de niaj teroj ».

La registaro nuligis la kursojn dum tago pro timo de ribeloj. La trafiko en la urbo Panamo estis perturbita kaj kelkaj metrostacioj devis fermi.

La polico menciis, ke 25 personoj estis arestitaj.

Malfermita en 2019, la subĉiela minejo de "Cobre Panama", situanta ĉirkaŭ 120 kilometrojn for de la ĉefurbo kaj 20 kilometrojn for de la karaiba marbordo, kapablas produkti po 300 000 tunojn da kupro jare.

En 2021, la Ĉefkortumo de Panamo ratifikis la decidon de unua tribunalo, laŭ kio la origina koncesio pri la minaj rajtoj konsentitaj al filio "Minera Panama" ĝis 2037, ne estas submetita al kondiĉoj.

La intertraktadoj inter la registaro kaj "First Quantum" rekomenciĝis kaj finiĝis komence de tiu jaro.

La nova kontrakto antaŭvidas, ke la entrepreno pagos po almenaŭ 375 milionojn da dolaroj jare, nome dekoble pli ol antaŭe, kaj permesas al "First Quantum" operacii en Panamo dum 20 jaroj, renovigeblaj por 20 pliaj jaroj.     

Sed la opoziciantoj opinias, ke tiu sumo estas ankoraŭ nesufiĉa, pro interalie la potencialaj minacoj kontraŭ la medio. La manifestaciantoj deziras abolon de leĝo adoptita vendredon por formaligi la kontrakton.

« Ni luktas kontraŭ la vendo de nia patrio », deklaris la sindikata gvidanto Saul Mendez.

La registaro asertas, ke la minejo estigos ĉirkaŭ 8 000 rektajn laborpostenojn kaj 40 000 nerektajn laborpostenojn, kontribuante tiel ĝis 4% de la malneta enlanda produkto (MEP) 

https://www.france24.com/en/live-news/20231023-panama-police-in-standoff-with-anti-canadian-mine-protesters

https://www.youtube.com/watch?v=HGk5vcKwZKQ

10/02/2014

Panamo : baraĵo kontraŭ la indianoj kaj por la profito

http://neniammilitointerni.over-blog.com/2014/02/panamo-bara%C4%B5o-kontra%C5%AD-la-indianoj-kaj-por-la-profito.html