14/09/2022

Tiu alarmisto, dizertulo de la siria armeo, estis taskita foti la kadavrojn ekzekutitajn post submetado al multaj perfortaĵoj. Li transmetis tiujn fotojn al opozicia mediato.

Tiuj bildoj, fotitaj ene de la malliberejo de Alepo, dua plej granda urbo de Sirio, estas tutsimple neelteneblaj. Senkarnaj kadavroj, kovritaj per bluaĵoj, vizaĝoj tiom ŝveliĝintaj, ke ili estas nerekoneblaj. 

Tiuj fotoj de civiluloj mortintaj sub la torturo de la reĝimo de Baŝar al-Asad estis transmetitaj de dizertulo de la siria armeo al opozicia mediato, poste enretigitaj. Preskaŭ 800 personoj estis tiel fotitaj.

La alarmisto estas eksa provoso de la malliberejo de Alepo. Abou Ahmed, pseŭdonimo, estis taskita foti la kadavrojn, plej ofte politikajn malliberulojn ekzekutitajn de soldatoj de la reĝimo de Baŝar al-Asad.

Elsavita esk-malliberulo, atestanto pri tiuj ekscesoj rakontas : « Mi vidis multajn kamaradojn suferi torturon. Ili frapis nin per ferstango kaj elektraj kabloj.  Al kelkaj, ili rompis membrojn. Aliaj estis ekzekutitaj per kugloj, aliaj malsatmortis, ĉar ili nenion donis al ni por trinki aŭ manĝi. »

Novaj pruvoj por eventuala proceso

Malfacilaj atestoj kiel tiu ĉi aperas de pluraj jaroj. La krimoj estas konataj sed la dokumentoj, kiuj pruvas la ekscesojn de la reĝimo de Baŝar al-Asad estas malabundaj… kaj do estas ege gravaj.

Gravaj antaŭ ĉio por la familioj: pli ol 110 000 personoj malaperis de post la komenciĝo de la enlanda milito, 11 jarojn antaŭen. Por iliaj proksimuloj, tiuj fotoj fine ebligas scii, kio okazis al frato, edzo, filo… kaj eble funebri, post jarojn da serĉado.

Sed ĉefe, tiuj fotoj konsistigas pruvojn de la krimoj plenumintaj de la siria reĝimo. Kaj por la defendantoj de Homaj rajtoj, ili renaskas esperon vidi iam la kulpintojn de tiuj masakroj ĉe tribunalo. Kompreneble ne en Sirio mem, sed en alia lando.

Tio okazis ĉi-jare en Germanio: unuafoje, alta gradulo de la siria reĝimo estis tie kondamnita al porĉiama malliberejo pro « krimo kontraŭ la homaro ». 

https://www.francetvinfo.fr/replay-radio/en-direct-du-monde/syrie-des-photos-de-civils-tortures-par-le-regime-de-bachar-el-assad-publiees-par-un-ancien-geolier_5348209.html

13/01/2022

Sirio : eks-altrangulo de la spionservo estas kondamnita je porĉiama malliberejo en Germanio

http://neniammilitointerni.over-blog.com/2022/01/sirio-eks-altrangulo-de-la-spionservo-estas-kondamnita-je-porciama-malliberejo-en-germanio.html

01/01/2017

1-a de januaro 2017: Rekviemo por Sirio (kronologio)

http://neniammilitointerni.over-blog.com/2017/01/1-a-de-januaro-2017-rekviemo-por-sirio.html

06/09/2022

En korprema frontartikolo, la redakcio de « Novaja Gazeta » akuzas la rusian potencon pri « provo de murdo » kontraŭ la fama opozicia ĵurnalo, « Novaja Gazeta », ĉar la licenco de ĝia papera versio estis definitive nuligita de la justico la 5an de septembro. La tribunalo de Basmannij, subdistrikto centre de Moskvo mortokondamnis Novaja Gazeta.

Kompreneble, la juĝistino Lipkina ne skribos tion en sia decido. Ŝi diligente kontentiĝos pravigi la volon nuligi la licencon de ĵurnalo, kiu ekzistas de tridek jaroj, Kaj kiu enkalkulas du laŭreatojn pri Nobelpremio inter siaj fondintoj: Miĥail Gorbaĉov kaj Dmitrij Muratov.  

La krimoj havas preskriptan tempolimon. Eĉ la murdoj. Nur la militkrimoj kaj la krimoj kontraŭ la homaro estas nepreskripteblaj.

Nun aldoniĝas al la listo, la fakto ne liveri certajn dokumentojn al la Roskomnadzor, la federala agentejo pri superrigardo de la mediatoj, en epoko kiam tiu organo eĉ ne ankoraŭ ekzistis.      

Tio okazis antaŭ dudek jaroj. Kaj aliparte infrakcio eĉ ne ekzistas. Tiuj aktistoj, kiuj rigardas sin kiel ŝtatajn opriĉnikojn, posedas ĉiujn postulatajn dokumentojn. Kaj tion ĉi ni pruvis dum la proceso. Tamen, ankaŭ la juĝistoj delonge sin rigardas kiel opriĉnikojn. Ili konservas en siaj fakmebloj siajn balailojn kaj siajn hundokapojn.

Senigitaj je rajto al informado

Hodiaŭ, ili mortigis la ĵurnalon. Ili ŝtelis de ĝiaj dungitoj, tridek jarojn de ilia vivo.

Kaj tio ne sufiĉas.

Hodiaŭ ili denove mortigis niajn kolegojn jam murditajn de tiu potenco, ĉar ili plenumis sian profesian devon: Igor Domnikov, Iuri Ŝtĉekotŝiĥin,  Anna Politkovskaja, Stanislav Markelov, Anastasija Baburova, Natalia Estemirova, Orkhan Djemal.

Novaja Gazeta ne bezonas viajn dokumentojn. Nia ĵurnalo vivis, vivas kaj vivos. Kiam tiu potenco ne plu ekzistos, tiuj juĝistoj ne plu estos, nek tiuj aktistoj. La libera spirito blovas kie ĝi volas, kaj kiam ĝi volas.

https://www.courrierinternational.com/article/liberte-de-la-presse-ils-ont-tue-notre-journal-le-cri-du-c-ur-de-novaia-gazeta-contre-le-pouvoir-russe

https://ru.euronews.com/2022/09/05/russian-court-confirme-to-stop-novaya-gazeta

https://www.youtube.com/watch?v=vleUlpzOT1E

28/03/2022

Milito en Ukrainio : la rusa sendependa ĵurnalo « Novaïa Gazeta » interrompas sian publikigon

http://neniammilitointerni.over-blog.com/2022/03/milito-en-ukrainio-la-rusa-sendependa-jurnalo-novaia-gazeta-interrompas-sian-publikigon.html

04/09/2022

La familo de Donovan Lewis decidis plendi.

Video montras policiston pafmortigante junulon, kiu troviĝas en sia lito.

La familio de juna Usonano pafmortigita de la polico plendos, anoncis ĝia advokato vendredon 2an de septembro. La afero estigas koleron en Ohio.

Mardon en Kolumbuso, ĉefurbo de tiu usona nord-orienta Ŝtato, Donovan Lewis, 20-jara, estis pafmortigita je tagiĝo, dum li plu estis en sia lito.

Video devenanta de la operaca kamerao de unu el la agentoj, kiu posedis arest-mandaton, montras policiston akompanatan de hundo. Li malfermas pordon de dormoĉambro kaj preskaŭ tuj pafas al junulo.

Enketo estis malfermita kaj la urbestro de Kolumbuso, Andrew Ginther promesis « plenan travideblecon » pri « la tragika morto de Donovan Lewis ».

La advokato de la familo, Rex Elliott, denuncis en komunikaĵo « uzadon de perforto ekscesa kaj absolute neutila ».

« Bildo post bildo, la video malkaŝas la veron: tri blankhaŭtaj policistoj akompanataj de agresema hundo de la hunda brigado trankvile pafmortigas junulon 20-jaran nearmitan, dum li leviĝis en sia lito konforme kun la ordonoj de la polico », asertis la advokato.

Demandita de la franca novaĵagentejo AFP, la polico de kolumbuso ne ankoraŭ estis kontaktebla. Ties ĉefino, Elaine Bryant, citita de la amaskomunikiloj asertis, ke la agento pafis ĉe la momento, kiam Donovan Lewis levis la brakon kaj ŝajne mantenis ion.

Nur elektronika cigaredo estis trovita apud li, ŝi precizigis.

Kolektiĝoj estas antaŭvidataj ĉi-semajnfine en Kolumbuso por « subteni la familion », « malfermi interdiskuton pri la polica perforto » kaj « postuli justicon por Donovan Lewis », diris Ramon Obey II, aktivulo ĉe la organizaĵo J.U.S.T, kiu agadas favore al socia justico.

https://www.francetvinfo.fr/monde/usa/etats-unis-la-mort-d-un-jeune-noir-tue-dans-son-lit-par-un-policier-provoque-l-indignation-dans-l-ohio_5340751.html

https://www.youtube.com/watch?v=9M8WgQA4L3U&t=1855s

05/07/0122

Usono : manifestacioj okazas en la ŝtato Ohio, post la video de nigrulo traborita per kugloj pafitaj de la polico

http://neniammilitointerni.over-blog.com/2022/07/usono-manifestacioj-okazas-en-la-stato-ohio-post-la-video-de-nigrulo-traborita-per-kugloj-pafitaj-de-la-polico.html

02/09/2022

Malkaŝita merkredon en Ĝenevo, la 18-paĝa dokumento de UN elvokas eblajn « krimojn kontraŭ la homaro », kaj mencias, ke ĝi kolektis « kredindajn pruvojn » de torturoj kaj seksaj perfortoj kontraŭ la ujgura malplimulto.

« La amplekso de la arbitra kaj diskriminacia enkarcerigo de Ujguroj kaj membroj de aliaj grupoj ĉefe islamaj (…) en kunteksto de striktigoj kaj senigoj, kaj pli ĝenerale de malobservado de la fundamentaj rajtoj tiel individuaj kiel kolektivaj, povas konsistigi internaciajn krimojn, aparte krimojn kontraŭ la homaro », mencias la Alta Komisiito de Unuiĝintaj Nacioj pri Homaj Rajtoj, direktita de la eks-prezidentino de Ĉilio Michelle Bachelet, en sia akuzado kontraŭ la ĉina politiko.  

« La asertoj, kiuj priskribas kutimajn praktikojn de torturo aŭ mistraktadoj, interalie truditaj medicinaj traktadoj kaj malbonaj kondiĉoj de enkarcerigo, estas kredindaj same kiel estas kredindaj la individuaj asertoj pri seksaj perfortoj bazitaj sur la genro », daŭrigas UN.

Krome, la raporto mencias internigadon de « signifa proporcio » de Ujguroj kaj islamaj malplimultoj, dum Ĉinio plu neas la kreadon de « kampoj », kiuj servas al enkarcerigo de la membroj de tiuj komunumoj, elvokante prefere « centrojn pri profesia formado ».

Ne menciante la terminon « genocido », la interregistara organizaĵo tamen konfirmas la akuzojn, kiuj delonge celas la ĉinajn aŭtoritatojn. Konklude de sia studaĵo, ĝi instigas la internacian komunumon agadi.

Laŭ Pekino, la dokumento baziĝas « sur misinformo kaj mensogoj fabrikitaj fare de la kontraŭ-ĉinaj fortoj ». La raporto de UN « misfamigas kaj arbitre kalumnias Ĉinion, ĝi enmiksiĝas en la internajn aferojn de Ĉinio », skribas la ambasadejo de Ĉinio ĉe UN en komento ligita al la raporto.

Tiu teksto, « politika ilo », verkita fare de « sbiroj » de la Okcidentuloj, « estas tute kontraŭleĝa kaj nevalida », severe respondis dum gazetkunveno Wang Wenbin, porparolanto de la ĉina ministrejo pri Fremdaj aferoj. Plurajn monatojn antaŭ la publikigo de tiu ĉi raporto, UN suferis premojn de Pekino, kiu provis ĝeni la esplorojn.

Laŭ Germanio unua lando, kiu reagis al la publikigaĵo, tiu dokumento « konfirmas, ke la situacio kaŭzas maltrankvilegon » koncerne la traktadon de la ujgura malplimulto.

« Ĉiuj personoj arbitre enkarcerigitaj estu tuj liberigitaj » petas Berlino, kiu admonas Pekinon, ke ĝi « permesu novan sendependan enketon pri tiuj asertoj de gravaj malobservadoj de la homaj rajtoj en Ĉinio ».                

https://www.lejdd.fr/International/persecution-des-ouighours-un-rapport-de-lonu-accable-la-politique-de-la-chine-au-xinjiang-4131414

https://www.youtube.com/watch?v=qi_g3uZIZuI

24/05/2022

"Xinjiang Police Files": miloj da fotoj atestas pri la represio de Pekino kontraŭ la Ujguroj

http://neniammilitointerni.over-blog.com/2022/05/xinjiang-police-files-miloj-da-fotoj-atestas-pri-la-represio-de-pekino-kontrau-la-ujguroj.html

31/08/2022

En raporto aperinta merkredon 31an de aŭgusto, la NeRegitara Organizaĵo pri defendo de la homaj rajtoj Internacia Amnestio alarmas pri la sorto de la Afganoj, kiuj provas fuĝi sian landon, kaj estas kaptitaj de la iranaj kaj turkaj sekurecaj fortoj.

Truditaj elpeloj, pafoj per veraj kugloj, arbitraj enkarcerigoj, torturo kaj aliaj mistraktadoj… Tiu surloka enketo – la unua pri la homaj rajtoj kondukita en Afganio, de post kiam la talibanoj ekregis la landon en aŭgusto 2021 – denuncas la sintenon de Turkio kaj Irano koncerne la Afganojn, kiuj provas fuĝi sian landon.

« Turkio kaj Irano trude elpelis milojn da Afganoj malobserve al la internacia juro, ĉar estas malpermesite resendi individuojn en landon, kie ili povas esti submetitaj al gravaj malobservoj pri homaj rajtoj, emfazas Marie Forestier, esploristino ĉe Internacia Amnestio kaj aŭtorino de tiu raporto. Neniu el la Afganoj, kiujn ni renkontis povis peti internacian protekton, kio kontraŭas la internacian juron. »

Dokumentitaj kazoj de hommortigoj

Tiu raporto estis realigita en Afganio ĉe 74 personoj atestantaj, ke ili estis trude elpelitaj. Inter ili 48 asertas, ke ili estis celitaj de pafoj, kiam ili provis transpasi la landlimojn kun Irano aŭ Turkio.

La raporto, nomita « Ili ne traktas nin kiel homojn », mencias interalie dek unu kazojn da kontraŭleĝaj hommortigoj de Afganoj fare de la iranaj sekurecaj fortoj kaj tri aliaj fare de la turkaj sekurecaj fortoj, kiam ili provis transiri la landlimon.       

« Hodiaŭ, la Afganoj spertas sensolvan situacion. Tiuj, kiuj volas forlasi la landon, kaj kiuj ne posedas pasporton aŭ vizon, ne havas alian opcion ol endanĝerigi sin. En diversaj lokoj laŭlonge de ilia vojaĝo tra Irano aŭ Turkio, la sekurecaj fortoj retropelas ilin kaj trudas ilin reiri al Afganio», precizigas Marie Forestier. 

Hodiaŭ, la limgardistoj en la tuta mondo malhelpas la azilpetantojn transpasi landlimojn, tio bedaŭrinde fariĝis banala.

Se ĉi tie, pro tio, kio okazas ĉe la irana landlimo kaj turka landlimo, ni atingas etapon en perforto, ĉar oni ne nur malhelpas ilin transpasi, sed oni malhelpas ilin riskante mortigi ilin, mortigante ilin en kelkaj kazoj, kaj pafante al ili.

La sekurecaj fortoj ankaŭ submetas ilin al torturoj, mistraktadoj kaj arbitraj enkarcerigoj.         

https://www.rfi.fr/fr/moyen-orient/20220831-amnesty-international-d%C3%A9nonce-l-attitude-de-la-turquie-et-de-l-iran-vis-%C3%A0-vis-des-r%C3%A9fugi%C3%A9s-afghans

https://www.youtube.com/watch?v=CmG8nxdWpo4

27/07/2022

Afganio: la « sufoka » represio fare de la talibanoj senigas « milionojn da virinoj kaj junulinoj je ilia rajto trasperti liberan vivon, alarmas Internacia Amnestio

http://neniammilitointerni.over-blog.com/2022/07/afganio-la-sufoka-represio-fare-de-la-talibanoj-senigas-milionojn-da-virinoj-kaj-junulinoj-je-ilia-rajto-trasperti-liberan-vivon-alarmas-internacia-amnestio.html

22/08/2021

Landlimoj : en Grekio kaj Turkio, muroj estas starigitaj por malhelpi alfluon de afganaj rifuĝintoj

http://neniammilitointerni.over-blog.com/2021/08/landlimoj-en-grekio-kaj-turkio-muroj-estas-starigitaj-por-malhelpi-alfluon-de-afganaj-rifugintoj.html