11/08/2022

La ŝippereo de boato de migrantoj marvaste de la grekaj insuloj Karpathos kaj Rodoso, en Egea maro, okazigis almenaŭ 50 malaperintojn.

Savoperaco plu okazas provante retrovi pluvivantojn. La boato ekirinta de Antalya, en Turkio, intencis atingi italajn marbordojn.

La havenaj aŭtoritatoj serĉis, merkredon 10an de aŭgusto, ĉirkaŭ 50 migrantojn malaperintajn, post kiam ilia boato sinkis sud-oriente de la Egea maro, en Grekio.          

« Laŭ la deklaroj de 29 sukuritaj personoj, 80 personoj ĉeestis sur la boato, do ĝis 50 personoj estis deklaritaj malaperintaj », menciis respondeculino de la gazetburoo de la marborda patrolo fine de la mateno.

Frumatene, la savoperaco estis ordonita fare de la ministro pri komerca ŝiparo Yannis Plakiotakis, post kiam li estis informita pri ŝippereo de boato de migrantoj marvaste de la insuloj Karpathos kaj Rodoso, en la Egea Maro, laŭ komunikaĵo de la marborda patrolo.      

La boato ekiris de la turka urbo Antalya, situanta sur la apudaj turkaj marbordoj, kun celo atingi Italion, laŭ la unuaj informoj de la marborda patrolo.

Multaj ŝippereuloj ne surhavis savveŝton

Kvar ŝipoj, kiuj navigis en la ŝipperea zono, du patrolŝipoj de marborda patrolo, kaj helikoptero de la greka aerarmeo, partoprenis serĉadon de la malaperintoj. Ili estis ĝenataj de fortaj ventoj, menciis ĉe radio Skaï Nikos Kokalas, porparolanto de la marborda patrolo substrekante, ke « multaj ŝippereuloj ne surhavis savveŝton ».     

La danĝera marveturado de ĉirkaŭ pluraj marmejloj inter la grekaj insuloj kaj la turkaj marbordoj de la Egea Maro, situanta en Orienta Mediteraneo, mortigas multajn migrantojn kaj rifuĝintojn, kiuj provas atingi Eŭropon per improvizitaj boatoj por fuĝi militon kaj mizeron.

De post januaro 2022, 64 personoj mortis en Mediteraneo, kaj 111 en 2021, laŭ la Internacia Organizaĵo por Migrado (IOM).

La lasta ŝippereo en la Egea maro okazis la 19an de junio. Ok personoj tiam mortis marvaste de la insulo Mykonos, dum 108 personoj estis sukuritaj fare de la grekaj marborda patrolo, laŭ la IOM.

La nombro de alveno de migrantoj kaj rifuĝintoj en Grekion, devenantaj ĉefe de Turkio, kreskis ĉi-jare, laŭ la grekaj aŭtoritatoj.

https://www.france24.com/fr/europe/20220810-gr%C3%A8ce-une-cinquantaine-de-migrants-port%C3%A9s-disparus-apr%C3%A8s-le-naufrage-d-un-bateau

Germana : https://www.youtube.com/watch?v=JvAFoMVLav4

Itala : https://www.youtube.com/watch?v=eSiuoSWWjSk

Potugala : https://www.youtube.com/watch?v=fpPi_nctKY0

Rusa : https://www.youtube.com/watch?v=fpPi_nctKY0

Hungara : https://www.youtube.com/watch?v=2CcGCog_mNM

11/04/2022

Pli ol cent mortintoj en Mediteraneo : Kuracistoj sen landlimoj denuncas la « seninteresiĝon » de Eŭropa Unio fronte al la dramoj de la migrado

http://neniammilitointerni.over-blog.com/2022/04/pli-ol-cent-mortintoj-en-mediteraneo-kuracistoj-sen-landlimoj-denuncas-la-seninteresigon-de-europa-unio-fronte-al-la-dramoj-de-la-mi

30/04/2022

Hekatombo - en 2021, pli ol 3 000 migrantoj mortis en maro, provante atingi Eŭropon

http://neniammilitointerni.over-blog.com/2022/04/hekatombo-en-2021-pli-ol-3-000-migrantoj-mortis-en-maro-provante-atingi-europon.html

04/08/2022

Dum gazetkunveno, okaze de la tria raporto de UN pri la mondaj konsekvencoj de la milito en Ukrainio, la ĝenerala sekretario de UN kritikis la entreprenojn pri petrolo kaj gaso. Ili riproĉas ilin « groteskan monavidecon ». 

« Estas malmorale, ke la kompanioj pri petrolo kaj gaso enkasigu rekordajn profitojn el tiu energia krizo, malprofite al la plej malriĉaj personoj kaj komunumoj, kaj kaŭzas enorman damaĝon al la klimato.

La sumitaj profitoj de la plej grandaj energiaj kompanioj dum la unua ĉi-jara jarkvarono atingas preskaŭ 100 miliardojn da dolaroj. 

Mi petas de ĉiuj registaroj, ke ili impostu tiujn ekscesajn profitojn kaj uzadu tiun monon por subteni la plej vundeblajn personojn en tiuj malfacilaj tempoj », deklaris la ĝenerala sekretario de UN en Novjorko merkredon 3an de aŭgusto.

Tiu raporto priatentas precize la energian krizon, kiu frapas la familiojn kaj la entreprenojn de multaj landoj.

Ĝi mencias interalie, ke de nun ĝis la fino de 2022, 345 milionoj da personoj povus sperti situacion de nutrada malsekureco en 82 landoj, nome 47 milionoj pliaj pro tiu milito.

La britaj entreprenoj BP kaj Shell aŭ la franca Total registris rekordajn profitojn dum la dua jarkvarono 2022, ĉiu enkasigante inter 5 kaj pli ol 9 miliardojn da dolaroj.

https://fr.africanews.com/2022/08/03/lonu-denonce-la-cupidite-des-entreprises-petrolieres-et-gazieres/

https://fr.euronews.com/2022/08/03/lonu-denonce-la-cupidite-des-entreprises-gazieres-et-petrolieres-qui-profitent-de-la-guerr

franca: https://www.youtube.com/watch?v=6YbXiXTvUg:

Germana: https://www.youtube.com/watch?v=E_IVkQBvFTA

Itala: https://www.youtube.com/watch?v=M393iR6heDI

Hispana: https://www.youtube.com/watch?v=LH0ndOJ3ggM

Portugala: https://www.youtube.com/watch?v=ktGdUv_0JIc

Rusa: https://www.youtube.com/watch?v=ZwydGB4L1DM

Greka: https://www.youtube.com/watch?v=9xfeaTNK3yU

Hungara: https://www.youtube.com/watch?v=3q1jVTmAyOE

22/03/2022

Ukrainio : la unuaj konsekvencoj de la milito jam estas senteblaj norde de Afriko

http://neniammilitointerni.over-blog.com/2022/03/ukrainio-la-unuaj-konsekvencoj-de-la-milito-jam-estas-senteblaj-norde-de-afriko.html

17/03/2022

Milito en Ukrainio : la ĉefo de Unuiĝintaj Nacioj alarmas kontraŭ « uragano de malsato » en la mondo

http://neniammilitointerni.over-blog.com/2022/03/milito-en-ukrainio-la-cefo-de-unuigintaj-nacioj-alarmas-kontrau-uragano-de-malsato-en-la-mondo.html

09/03/2022

Klimato : nova rekordo de emisioj de CO2 en 2021

http://neniammilitointerni.over-blog.com/2022/03/klimato-nova-rekordo-de-emisioj-de-co2-en-2021.html

02/08/2022

Tiu afero emociegis Argentinon… La 1an de aŭgusto 2017, Santiago Maldonado malaperis post sia partopreno al manifestacio subpremita de la ĝendarmoj en la provinco Ĉubutio.

78 tagojn poste, lia senviva korpo estis retrovita flosante sur riverego.

Lundon 1an de aŭgusto, okaze de la kvina datreveno de lia malapero, liaj proksimuloj organizis kolektiĝon por postuli enketon.

Sur la placo de Majo en Bonaero, centoj da personoj svingas la saman foton: longaj haroj, nigra barbo, vigla rigardo, Santiago Maldonado hodiaŭ kaj por ĉiam.

La slogano estas la sama, ol tiu skandita de antaŭ 40 jaroj fare de la proksimuloj de viktimoj de la milita diktaturo.

Adriana Lewi, filino de malaperintoj venis diri « nunca más », (« neniam plu  », : « Tio, kio okazis al Santiago havas rilaton kun la diktaturo kaj la institucia perforto. Tio estas emblema kazo, ĉar ĝi estas trudita malaperigo. »

Nova atesto

En 2018, la juĝisto taskita pri la enketo konkludis, ke la junulo dronis per si mem kaj klasifikis la aferon, malkulpigante la ĝendarmojn.

Lia familio denuncas la malkoherecojn kaj la kontraŭdirajn atestojn forlasitajn sen pravigo. Sergio Maldonado, la frato de Santiago petas novan enketon, delonge atenditan. Li denuncas: « De kvin jaroj, nepuniteco regas en la afero Santiago Maldonado. Kial li rifuzas esplori ĝin kiel truditan malaperigon ? Kiom da tempo ni atendu, ke nova juĝisto estu elektita por serioza enketo ? »

En majo 2022, la atesto de ĝendarmo deĵoranta en la zono, kie malaperis Santiago Maldonado kontraŭdiras la hipotezon de dronado, kaj revigligas la esperojn de justico por la familio de la junulo.

https://www.rfi.fr/fr/am%C3%A9riques/20220802-affaire-maldonado-cinq-ans-apr%C3%A8s-une-manifestation-en-m%C3%A9moire-du-militant-disparu

https://www.youtube.com/watch?v=ku1zMkvaLTA

02/09/2017

Argentino: en Bonaero, la strato postulas reaperon de la aktivulo Santiago Maldonado

http://neniammilitointerni.over-blog.com/2017/10/argentino-la-kadavro-malkovrita-estas-ja-tiu-de-la-aktivulo-santiago-maldonado.html

29/07/2022

Bildo: migranto tenas flagrubandon dum manifestacio kontraŭ la repuŝoj de migrantoj kaj la perfortoj ĉe la landlimoj apud la greka parlamento en Ateno la 20an de februaro 2022.

Raporto de la "Eŭropa Kontraŭfraŭda Oficejo" (EKFO), malkaŝita de pluraj mediatoj, akuzas la eks-estraron de la "Eŭropa agentejo por la mastrumado de la eksteraj limoj" (Frontekso) pri kontraŭleĝa repuŝo de migrantoj en Grekio.

La eks-estraro de la "Eŭropa agentejo por la mastrumado de la eksteraj limoj" (Frontekso) ja tute sciis pri la kontraŭleĝaj repuŝoj de migrantoj en Grekio, kaj ŝajne eĉ kunfinancis tiujn repuŝojn.

Tion malkaŝas nerefutebla raporto, kies Der Spiegel, germana semajna ĵurnalo, publikigis eltiraĵojn, ĵaŭdon 28an de julio.   

Frontekso tre frue konis tiujn kontraŭleĝajn repuŝojn, kelkfoje perfortajn, de azilpetantoj al Tunizio, asertas tiu plu konfidenca raporto de la "Eŭropa Kontraŭfraŭda Oficejo", ankaŭ konsultita de la franca ĵurnalo Le Monde, kaj la retejo pri esplorado Lighthouse Reports.

« Anstataŭ malhelpi la repuŝojn (retropeloj sen antaŭa studado de la azilpeto de la rifuĝintoj), la eks-estro Fabrice Leggeri kaj ties kunlaborantoj kaŝis ilin. Ili mensogis al la Eŭropa parlamento kaj kaŝis la fakton, ke la agentejo subtenis kelkajn repuŝojn per la mono de eŭropaj impostpagantoj », resumas la germana magazino.

La konkludoj de la enketistoj kaŭzis la demision de Fabrice Laggeri fine de aprilo.

Proceduroj « neakordigeblaj kun la eŭropa juro »

Dum oficiala vizito en Ateno, la germana ministrino pri internaj aferoj Annalena Baerbock opiniis, ke la cirkonstancoj de ĉiu repuŝo estu klarigitaj.

« Kvankam mi ne povas detale kontroli, kio okazis en ĉiu individua kazo », « repuŝoj okazis, kiuj estas neakordigeblaj kun la eŭropa juro », bedaŭris la ministrino dum vizito ĉe la oficoj de Frontekso en la greka ĉefurbo.                    

La EKFO raportas interalie, ke almenaŭ ses grekaj ŝipoj, kunfinancataj de Frontekso, estis implikitaj en pli ol deko da repuŝoj inter aprilo kaj decembro 2020, kion ĉiam neis la direktoro.    

Demandita pri la publikigaĵo, porparolanto de la "Eŭropa Komisiono" substrekis, ke « serio de aranĝoj » jam estis efektivigita por solvi la demandon pri administracio de la agentejo, estrita de post julio de la latvianino Aija Kalnaja.

https://www.francetvinfo.fr/monde/europe/migrants/migrants-refoules-en-grece-un-rapport-accable-les-anciens-dirigeants-de-l-agence-europeenne-frontex_5282416.html

https://www.youtube.com/watch?v=GLdoxSL3seo

28/01/2022

Grekio : Neegistaraj Organizaĵoj denuncas ekskludon de miloj da rifuĝintoj el distribuado de manĝaĵoj

http://neniammilitointerni.over-blog.com/2022/01/grekio-neegistaraj-organizajoj-denuncas-ekskludon-de-miloj-da-rifugintoj-el-distribuado-de-mangajoj.html

27/07/2022

De post sia ekrego en aŭgusto 2021, la talibanoj « malobservis la rajtojn de la virinoj kaj knabinoj al edukado, laboro kaj movlibereco », opinias la NRO, kiu postulas profundajn politikajn ŝanĝojn.

La « sufoka » represio fare de la talibanoj en Afganio senigas « milionojn da virinoj kaj junulinoj je ilia rajto trasperti liberan kaj feliĉigan vivon en sekureco », denuncas merkredon 27an de julio en raporto Internacia Amnestio, preskaŭ jaron post la ekrego de la talibanoj.

De post kiam ili ekkontrolis la landon la 15an de aŭgusto 2021, la talibanoj « malobservis la rajtojn de la virinoj kaj knabinoj al edukado, laboro kaj movlibereco », asertas la NRO.

La sistemo de protektado kaj subteno al la personoj, kiuj fuĝas domperforton estis detruita. Virinoj kaj knabinoj estis arestitaj pro negravaj malobeoj al diskriminaciaj reguloj. Edziĝoj de infanoj, fruaj kaj devigaj edziĝoj ege kreskis en Afganio en daŭro de preskaŭ jaro.

Amnestio substrekas, ke ĉiuj detaloj de la ĉiutaga vivo de la virinoj kaj knabinoj estas kontrolataj kaj submetitaj al gravaj limigoj: ĉu ili povas frekventi lernejon, ĉu kaj kiamaniere ili laboras, ĉu kaj kiamaniere ili eksteriĝas.

En preskaŭ jaro, la talibanoj enkondukis politikojn de sistemaj diskriminacioj, kiuj atencas iliajn rajtojn, asertas Internacia Amnestio.

La virinoj kaj knabinoj, kiuj manifestaciis kontraŭ tiu represio estis objekto de arestoj kaj arbitraj malliberigoj, trudaj malaperoj, kaj agoj de fizikaj kaj psikologiaj torturoj.

Amnestio postulas profundajn politikajn ŝanĝojn

Koncerne edukadon, la talibanoj plu malhelpas plimulte de la knabinoj, ke ili frekventu la kursojn de duagradaj lernejoj.

Ĉe la universitatoj, la turmentado suferigita al la studentinoj fare de la talibanoj kreis malsekuran medion, kie la studentinoj estas sisteme malavantaĝitaj.                 

En sia raporto, internacia Amnestio postulas de la talibanoj, ke ili adoptu profundajn politikajn ŝanĝojn, kaj aranĝojn celantajn respektigi la rajtojn de la virinoj kaj knabinoj.

La NRO alvokas ankaŭ la internacian komunumon, ke ĝi trudu aranĝojn fronte al la sinteno de la talibanoj. Ĝi pledas al firma strategio por instigi tiujn ŝanĝojn. Ĝi postulas interalie specifajn punojn aŭ malpermeson vojaĝi, pere de rezolucio de la Konsilio de sekureco de Unuiĝintaj Nacioj. Pritemas devigi la talibanojn, ke ili prenu siajn respondecojn koncerne la traktadon rezervitan al la virinoj kaj knabinoj, sen malutilo al la afgana loĝantaro.

Por tiu raporto, esploristoj de Internacia Amnestio enketis en Afganio de septembro 2021 ĝis julio 2022, baziĝante interalie sur interparoladoj kun 90 afganaj virinoj kaj 11 knabinoj, aĝaj de 14 ĝis 74 jaroj, kaj loĝantaj en 20 el la 34 afganaj provincoj.     

https://www.francetvinfo.fr/monde/afghanistan/afghanistan-la-repression-suffocante-des-talibans-prive-des-millions-de-femmes-et-de-jeunes-filles-de-leur-droit-de-mener-une-vie-libre-alerte-amnesty_5278750.html

https://www.youtube.com/watch?v=oqWvtP41EiU

15/08/2021

La afganaj virinoj ne volas reveni dudek jarojn antaŭen

http://neniammilitointerni.over-blog.com/2021/08/la-afganaj-virinoj-ne-volas-reveni-dudek-jarojn-antauen.html

23/03/2022

Afganio : la talibanoj ordonas fermadon de la duagraj lernejoj por knabinoj, nur kelkajn horojn post la komenciĝo de la unua lerneja tago

http://neniammilitointerni.over-blog.com/2022/03/afganio-la-talibanoj-ordonas-fermadon-de-la-duagraj-lernejoj-por-knabinoj-nur-kelkajn-horojn-post-la-komencigo-de-la-unua-lerneja-ta