Peruo: Labourstart kampanjo: reenpostenigu la laboristojn, kiuj estis maldungitaj, ĉar ili postulis protektadon kontraŭ la Covid-19

06/06/2020

La sindikato UNI Commerce petas de la sindikatoj kaj laboristoj el la tuta mondo, admoni Falabella (ĉilia multnacia entrepreno pri podetala hejm-vendo), ke ĝi reenpostenigu 22 laboristojn, kiuj estis maldungitaj, ĉar ili petis pli bonan protektadon kontraŭ la Covid-19 en Peruo. Post portempa fermado, la distribua centro de Falabella estis antaŭnelonge malfermita denove en Peruo.    

Tamen, la entrepreno ne efektivigis la necesajn aranĝojn por protektadi la laboristojn kontraŭ la Covid-19. 22 laboristoj tiam uzadis sian leĝan rajton pri rifuzo de laboro, ĝis kiam la necesaj antaŭzorgoj estos prenitaj. Tiu ago instigis la entreprenon plibonigi la aranĝojn. La 22 laboristoj relaboris, sed la entrepreno maldungis ilin ĉiujn sen monkompenso. Dum ekzistas almenaŭ 30 konfirmitaj kazoj de Covid-19 en la distribua centro, la direkcio de Falabella preferas lukti kontraŭ la laboristoj kaj la sindikato prefere ol lukti kontraŭ la Covid-19. Vi povas subteni la 22 peruajn laboristojn, sendante mesaĝon al la direktoro de la entrepreno kaj al la loka estraro.    

Kampanjo en Esperanto:

https://www.labourstartcampaigns.net/show_campaign.cgi?c=4359

Retmesaĝo

S° Gastón Bottazzini

Direktoro, Falabella

Dudek du laboristoj de la distribua centro de via entrepreno en Peruo estis maldungitaj, simple ĉar ili uzadis siajn leĝajn rajtojn kaj petis pli bonan sekurecon kontraŭ la Covid-19. Kvankam konfirmitaj kazoj de Covid-19 ekzistas en la distribua centro, mi eksciis bedaŭre, ke via entrepreno luktas kontraŭ la laboristoj kaj iliaj sindikatoj, prefere ol kunlabori kun ili kontraŭ la pandemio. Mi urĝe petas de vi tujan reenpostenigon de tiuj laboristoj, ke vi ĉesigu timigi la laboristojn kaj adoptu la necesajn aranĝojn por garantii ilian sekurecon.

Partnerece kun UNI Commerce Global Union, aliĝinta al UNI Global Union, federacio, kiu reprezentas pli ol 20 milionojn da laboristoj en pli ol 150 landoj, ĉefe dungitaj en la sektoro de servoj. UNI Commerce estas unu el la sektoroj de UNI Global Union, kiu reprezentas pli ol 160 sindikatojn kaj pli ol 4 milionojn da laboristoj, dungitaj en la industrio pri podetala kaj pogranda komerco.